About us| ZOKAM INTERNATIONAL VERSION

Your word is a lamp to my feet and a light for my path.Psalm 119:105

Kizop Nading:
Zokam Bible Press
1735 Autumnwind Ln
Aurora IL 60504,USA
Phone: 630-570-1671            Fax: 630-462-7566

Mission Statement
To provide Zo People a good bible

To let Zo People hear and understand the message of God’s love in their heart language.

To deliver the Word of God to Zokam speaking peoples in India, Burma, Southeast Asia, and across the world

Myanmar ZIV Translation Comittee

Dr. Neng Khan Thang, Th.M; DD                   Chairman

Rev. Zam Khat Kham, Th.M;  Ph.D(Can)     Co-ordinator

Mr. Thang Pil Mung, B.C.Sc. (Hons.)             Secretary

Members

Rev. Tual Khan Pau, B.D; M.Div
Rev. Hung Suan Kim, Th.M; Ph.D(OT)
Rev. Nang Za Thawn, B.A.B.S; M.Div.
Mr. Thawng Hlun, M.Div.; M.Th
Mr.Lian Sian Mung, M.Th, Ph.D(Can)
Dr. H. Gin En Cin, B.C.Min; D.D

India ZIV Translation Comittee
Rev.N. Phungzapau B.Sc, B.D., Th.M                   Chairman

Rev. Kamkhanthang Th.M., D.D                       Coordinator

Rev. T. Jamkhothang(the late) B.D., M.Bd.    Secretary

Members
Rev. L.Khamkholun B.D.M.Th
Rev.S.Nengzakhup B.A., M.Div.


ZIV.Zokam Laisiangtho Thu Tom

Mikang kama Laisiangtho New International Version (NIV) pen Laisiangtho lam pilna sang nei mi zakhat in Hebrew, Aramaic le Greek Laisiangtho pana a letkhiat uh ahi hi. Tua mipilte United States, Great Britain, Canada, Australia le New Zealand a om biakna pawl tuamtuam: Anglican, Assemblies of God, Baptist, Brethren, Christian Reformed, Church of Christ, Evangelical Free, Lutheran, Menmonite, Methodist, Nazarence, Presbyterian, Wesleyan le biakna pawl dangte kikop khawma kibawl ahi hi. Hih a kiteelkhia mi zakhatte in tanglai-a Laisiangtho kigelhna khutgelh tuamtuamte banah Si Tuipi Laizial (Dead Sea Scroll) a kimu nunung pen tawh limtakin sittel-a a letkhiat uh ahi hi. Tua ahi manin tu khanghuna a hoihpente lakah khat ahi hi. Hih NIV pen 1978 kumin Laisiangtho buppi kihawmkhia hi.


1983 kum ciangin H. Gin En Cin in a letkhiat ding kipan pah hi. Tua huna sak le khanga om Zomite laka  Laisiangtho pilna nei mi sagih in a zawh sate en kik uh hi.1986 kum ciangin Laisiangtho Thak kizosiang a, Wycliff Bible Society-te in hoihtakin a sittel khit ciangin Bible League-te in hong khetsak uh a 1994 kum ciangin  kihawmkhia hi.


Laisiangtho Thak a suah khit ciangin Laisiangtho Lui pan leuleu uh a Kawlgam ah Committee behlapin mi sawm le khat in sem uh hi. Tuate in a kisam masa Phatna-late le Paunakte  sem masa-in a zawh phetun Laisiangtho Thak tawh gawmin Bible League-te mah in 2000 kumin  hong khetsak uh a tua kum mah in kihawmkhia hi.Tu-in Laisiangtho buppi Zokam International Version (ZIV) kizo siang ta a, a khatveina kihawmkhia ding hita hi. Leitung bupa om Zomite in i zattang theih dinga Committee-te bawl hi a, Zokam le mikang kam a kituak thei pen ding le a maan pen dinga kibawl ahi hi. Mihing min le mun minte mikangte aa kizang pah hi..


Mihing hina tawh khial lo ding kici thei lo ahi manin a khialhna a mu peuhmah in Committee-te tungah hong theisak un. A hoihna a mu peuh in Topa minthan nadingin mite mai-ah na pulaak un. ZIV Laisiangtho buppi i neih amasak pen hi dinga mailam ciangin a hoih semsema a puahpha dingin mipil misiam Topa in hong pia  ding hi.


Hih zaha ma hong tutpih tha le pilna hong guan i biak Pasian in Ama minthan nading le A gam zai nadingin zang ta hen ci-in Ama tungah A kammal Siangtho i ap hi..


Matutnasate
ZIV Zokam Laisiangtho (NT)     Copies 20,000 (1994)
ZIV Zokam laisiangtho  (NT, Psalms & Proverbs) Copies 10,000(2002)
ZIV Zokam Audio Bible (NT) (2009)
PoweBibleCD with ZIV Zokam Bible(Study Software) (2010)
ZIV Zokam Laisiangtho Mobile Application at APPS.Store (2010)

Zokam – English Bible ( The Book of Wisdom) (2010)

Laisiangtho sep sunga omzia(Dr.H.Gin En Cin’s Notebook pan)

1)      Pasian kammal ahi manin ka gelhsa laidalte ekbuk khawng ah koih loin mei-in ka haltum tektek hi.

2)      A hih theih laisiah nupa lupkhawm nangawn kidawmin ka siantho theih zahin ka kidaam hi.

3)      Zunthak ekthak hun ciangin khut silsiang loin na sep ka pan kei a, veihsang kawm khawngin ka sem ngei kei hi.

4)      Laisiangtho sep laitakin ciamnuih thanghuaite ka gen kei hi.

5)      Nidang lai-ate bang ahi zo kei zongin laikung, laidal a siangtho theithei in ka zat na’ng ka hanciam hi.

6)      Laisiangtho ka sep sung ka tutna pana dingkhia lianga ka lungsim hong sukha mun David in a galkap pa zi kisil a muh khit ciangin lupih a, agai ding lau-in ama mawhna pen a galkap mangpa tungtawnin sel sawm hi. Galkap mangpa in thei lo hi. A gam ading citakin na sem napi David in zu tehkhamin sawl teitei hi.Galkap mangpa in mang tuan loin a zi tawh lum dingin ciah tuan lo hi. Tua hi-a a thutakna, sih lawh hiau hi. David  mawhna selna le galkap mangpa cihtakna kinak khaih luatna ka teikhiat laitak in om thei loin ka dingkhia-a ka tawlnga phot zawzen hi. Tuampian ka sakpen Kamsang putekpa in kamsangpa a khema kamsang khangnopa humpi in meklumin a gei-ah cinga a tuanna laa le humpi dingkhawm a om, cih zong tuampian ka sa mahmah hi.

7)      Innkuan sungah heh huna Laisiangtho tei ka hih khak ding ka kidawm hi.

8)      Ka zi ka tate kiangah hih a tunga thute a theih dingun ka gen hi

9)      Ka zite ka tate kiangah Laiangtho ka tei sungteng hehsak lohna tawh hong huh un,

ka ci hi

10) Laisiangtho tei dinga ka ki-ap ciangin khedap bulhsa-in thu ka ngen ngei kei hi.

ZIV Teizia(Dr.H.Gin En Cin’s Notebook pan)

  1. Kammal kituak theipen ding ka zang hi. (gt. Pengkul mut adt.)
  2. Kammal a mun maan liana bulh ka sawm hi. (Pasian’ gouluah adt.)
  3. A kitel nak leh laigual a tom theithei zang. (gt. For =Ahang in adt.)
  4. Kammal khiatna neite a khiatna bangin zang(Sawltakpite, vansawltakte adt.)
  5. Zatsa le i zongsatsa ahi zongin a maanzaw om leh zang (Nasepte-Acts, Kilaakna-Revelation, Taamlawhna-Lamentation adt)
  6. Mihing min, gam min, khua minte – Jesu lobuang mikangte aa zang.
  7. (gt. Christ, Macedonia adt.)
  8. Kua zat kua zat hitaleh Zokam pau khat in  a zat ahileh mi namdangte aa kawm sangin zangzaw( Saptuam adt.)

ZIV Sunga Kizang Kammalte

Hih Laisiangtho Zokam International Version (ZIV) a piankhiat theih nadingin sak le khanga om Zomite in kikop khawma kisem ahi hi.  Tuhun laitaka mikang kama kizangtangpen New International Version (NIV) pana kiletkhia ahi hi.

Sak le khanga om Zomite in i zatkhawm nawn loh Zokam maan pawlkhat om hi.  Tua banah i zatsa mah a manzaw hi ci-a Committee te in a theih pawlkhat zong om hi.  Tuate a maan banga i zat theih nadingin hih Laisiangtho sungah kong zang uh hi.  Hihte i zattungin i siampah kei ding hi. Zangzang leng i zongsat ciangin kicianin khum ngutngut ding hi.

Kampau luanzia kibang kim lo ahi manin na sim tungin haksa na sak om ding hi.  A kammal nei Pasian a lungduai bangin lungduai takin sim lecin na zongsang dinga nuam na sa ding hi.  Na sim ciangin a khiatna nei dingin sim inla a khiatna nei lo theithei dingin sim kei in.  Pasian kammal ahilam phawk kawmin sim in.

A sunga minte tuhuna leitung bup in a zattang mikang kam tawh  a kinai thei pen dinga kigelh ahi hi.  A lawhhak lote mikang laimal mah kizang suak hi.  Mailam hunah i zattang ding min i bawlkhawm zawh ciangin Laisiangtho version tuamtuam ah min a kibang i zat ding i lamen hi.

Ahang in (for) Hih kammal a kizatna munah “for” lehna-in kizang mun pen hi. Mikang kamin “because” a cih ciangin “bang hang hiam cih leh” ci-in kileta “for” tawh a kibang phial zongin kilamdansakna kul thei ahi mainin “ahang in,” cih kammal sang a a hoih zaw om lo hi.

Angvan (favour) Hih kammal pen panpih, gum cihna muna kizang hi a, kamthak tawh a kibat hangin tangkam hoih mahmah ahi hi.

Angkawm (iniquity) Tangkam i tam zat nawn loh khat hi. Ama’ zi’ ang lawi-a, mi zi’ anga a va lum pakte “angkawm” ahikeh “angsim” kici hi.

Bit (virgin) Hih kammal pen nungak tunga i zat ciangin siangtho ci leng a ci siangtho a kipuah siamte cihna zong suak thei hi. “Bit” ci-a nungak tungah i zat ciangin kuaman luppih nai lo, a kisia om nai lo vang nai lo, bit lai cihna hi a, telkhialh nading om nawn lo hi.

Bawng’ (clan) Hih ZIV kigelhzia pen Israel-te minam suak taktak nai lo, amau unau teng mah a nuntak hun lai ua dinga kigelh ahi manin a beh, a bawng’ a khil cih banga kigelh ahi hi.  Tua tawh kizui-in a hun genna ah zong a nai-in gen loin “vil” santali din hunin na gen hi.

Baptize (baptise) Hih kammal pen Greek pan hi a, “thuzawh” ci-in let leng naih pen hi.  Tui sunga phumna te ah “tuiphum” mah in let leng kituak hi. Ahi zongin Moses, mei, le Kha Siangtho hihte tawh hong kizop ciangin tuiphum kici thei nawn lo ahi manin a veka huam kim dingin a bulpi mah zangin “baptize” ci leng huam kim zaw hi.

Gim namtui (incense) Pak namtui ci-a i zat ciangin maizutna khawnga i zat a namtuite kawk zawdiak hi. Tua ahi manin biakna-a kizangte gim namtui ci leng biakna-a kizang a gim namtui na khempeuh huam khin hi.

Gou (treasure) Tangkam hoih mahmah khat hi. Gamh tawh kam unau-a kizang hi.  Khangluite in “ka goupi, ka gamhpi – ka thaulawng, ka innpi, ka dolcial” ci uh hi.  A neite a dam lai-un a neih manpha khempeuh uh “gou” kici a, a neite a sih khit ciangin a neite gamh khina om nawn lo uh ahi manin “gamh” kici ahi hi.

Gunkuangpi (Ark) Noah te huna tuitunga painate set tawh kihawl nai loin huih mut ahikeh a kihot ahi manin tembaw i cih sang in “gunkuangpi” ci leng kituakzaw hi.

Halelujah Hih pen Hebrew kam hi a, Jah Pasian kiphat hen cihna ahi hi.  Kammal dangin let ta leng a cihnopna a cinzo ding om thei lo ahi manin  a kammal bulpi mah zangpah leng kician hi.

Haltum-a biakna (burnt offering) Mei tawh ganhing sa le a thaute a tum siang dong kihal ahi manin “haltum-a biakna” ci leng kituak pen hi.

Hehpihna, lainatna, khuatuahna (grace, mercy, compassion) Hih kammal teng a kibang hiamhiam hi a, hehpihna, laitnatna, khuatuahna kici thei kim phial hi. Ahi zong mun khatah a kizoma a om ciangin a tunga bangin khen loh phamawh hi.

Hi le hih Hihte gel pen a awgin a kibang a khiatna kilamdang ahi hi. “Hih” ci-a a kizat ciangin sem “do” cihna le “hih” “this ahikeh these” cihna hi. “Ahi hangin” “hi” cihna-a a kizat ciangin “sem” cih tawh a gin kibanga tom ginsak ding ahi hi.

Hong le ong “hong” le “ong” a cihnopna kibang hi a, “hong” cih pen sausak leng “nang hong” ahikeh “na hong” cihna ahi hi.  Ahi zongin laikam-a i gelh ciangin “hong” kizang a, kampau-a i gelh ciangin “ong” kizang hi.  Tua mah bangin “kong” cih kammal zong “ka hong” cih tanga kizang hi a “kong” cileng cing khin hi.

Jesu (Jesus) A beisa hunin Cope in Greek-te aa na la-in Zeisu na ci hi.  Ei aa in zong lawh nuam mahmah hi. Ei Laisiangtho Mikang kam pana i lak cianign khel teitei sawm leng “Jesu” i cih hoh a nuam pen ahi tam, ci-a kizang ahi hi.

Kha le kha (Spirit and spirit) A patna “K” laimalpi-a a kigelh ciangin Pasian a nungta “Kha” ahina genna hi a, “kha” a patna “k” a no-a a kigelh ciangin kha dang mawkmawkte genna hi. Kha siangtho pen a tuam mahmah hi-a, hihte tawh kigawm thei lo hi.

Khuatuah (compassion) Hih pen tangkam lakam a suak hi a, ahuh ding ding a om lo, meigong tagahte le a cimawhte tunga kizang kammal ahi hi. Compassion leh nadingin kammal dang haksa hi.

Kilaakna (Revelation) Hih pen Jesu a kilaak lai-a Zawhang muhna lampanga genna hi. Reveal let ding hi leng “kilaak” mah cih ding ahi manin mikang kam zui-in nidanga “Mangmuhna” i cihsa pen “Kilaakna” ci-in kikhel hi.

Le le leh (and le if) Mikang kama and pen “le” in kilet a “if” pen “leh” in kilet hi.  Ahi zongin “hi” le “hih” mah bangin “le le “leh” zong “hih” ginin ging tuak ding hi.  Hih pen kawllai gelh cianga a mal man ding, a gin ciangin a aw man ding a cih banga zat ding pawl ahi hi.

Len (net) Ngasa khuhna-a kizang hi.  A sunga om peuhmah zusa, vasa, ngasate lencip, mancip ahimanin “len” kici ahi hi.  A mong kimkota  a giksak dinga kikhaite “ngen” kici hi.  Tangkam ahi hi.

Mawhpeng (innocent) Mawhna a bawl ngei lote genna hi.  Kammal khata gen khiat nadingin kituak pen hi.

Misimna (Numbers) Laisiangtho min “Gamlakvakna” a kici pen hi.  A thu-in a manphial zongin “numbers” lehna dingin “Misimna” mah kituak pen hi.

Pahtakman (reward) Thalawhsa, thaman hi lo – na hoih khat sema a na sepna hanga pahtakna tawh kipiate ahi manin “pahtakman” ki ci hi.

Pasian-mina (godliness) Pasian upna hanga  a hoih a gamtatna hi a, ei kamin kamkhata lawh nading haksa hi.  A kinai pen dingin a mikang kam pan let in “pasian-mina” lo a dang om thei lo hi.  Tua mah bangin (godlessness – pasian neihlohna, ungodliness – pasian-milohna, ci-in kiletkhia hi.

Nasepte (Acts) A thu-in Sawltakpite nasepte hi.  Ahi zongin “act” guak let dingin “sawltakte tangthu” cih ding pen mikang kam tawh kilamdang lua hi.

Saptuam (Church) Pawlpi i cih in zong let zo napi a khiatna a kitelsakpah dingin “saptuam” cipah leng kitelpah zaw hi.  Tua banah kipawlna tuamtuam tawh zong kitelkhial lo hi.

Vansawltak (angel) vantunga om nuntakna neite (heavenly being) a tuamtuam hi a, galkap pawl, thupuak pawl, lasa pawl le sawltak pawl cih bangin kikhen dimdiam hi.  Hih angel kicite sawltak bek a semte ahi manin “vansawltak” ci-in vana om khempeuh vantung mi cileng i khenzia kicing pen hi.

Thukhun (Testament) Pasian le mite kikala zat dinga Pasian in thu a khunsak ahi manin Thukhun ci leng man pen ding hi.

Khrist (Christ) Hih pen mikangte in Christos pana a lak ahi hi.  Cope topa in i Laisiangtho sungah Khazih na ci hi.  Tu-in ZIV ah mikang kam minte a kinai theithei a kizui ahi manin Khrist kici hi.  Khrist thuzuite zong Khristian kicipah hi.

Sikhiau (Autumn) Khuadamna gamdangte mah bangin Zogam ah zong i pu i pate in khuahun li na omsak uh hi.  Phalbi, Khuakhal, Tuk le Sikhiau ahi hi.  Phalbi tun kuan khua a sikhiauhiau sung teng “Sikhiau” kici-a September, October le November kha sungteng huam hi.

Taamlawhna (Lamentation) Dah hun ciangin kapsa in lah thu kigenkawm thei a, kapkhia loin zong thu kigen hi.  A diakdiakin numeite in kapsa in thu genkawm uh a, pisalte in kapkhia se loin thu gen uh hi.  A nihin “taamlo” kici tuak hi.  Kah la i cih ciangin numeite in kapkhia kawma a gente uh ahi hi.  Tua hi-a a nih a huamkhawm dingin Laisiangtho sunga Lamentation pen “Taamlawhna” kici hi.

A hoih lohna khatpeuh le a kisapna a mute in Committee-te tungah hong gen un, puahpha lai ni.  A hoihna na muh leh Pasian minthan nadingin midangte tungah na gensawn in.  Hizah a ma hong tutpih i biak Pasian in minthanna tang hen la, a sim mimal tungah a thupha namkim hong pia ta hen.

Zokam Bible Translation Committee, mtc: ygn/July 20, 2000

Copyright © 2010 by Zokam Bible, All Rights reserved, E-Mail: thangpil@gmail.com